Vukićević: Mladima ne pripada stolica za goste, već stalno mjesto za stolom za kojim se odlučuje
„O svojoj budućnosti moramo odlučivati zajedno sa onima koji danas donose odluke. Ali za tim stolom moramo imati svoje mjesto. Ne stolicu za goste. Nego stalno mjesto“, poručio je predsjednik MOACG David Vukićević na jubilarnom, petom Forumu MOACG 2026 „Ko odlučuje o budućnosti mladih?“
Govoreći o novom Zakonu o mladima, Vukićević je poručio da omladinske organizacije moraju biti sistemski prepoznate, a mladi uključeni od prepoznavanja problema do donošenja i praćenja odluka.
💬 „Ne tražimo još jedno mjesto na fotografiji. Ne tražimo još jednu konferenciju na kojoj ćemo čuti koliko smo važni. I sigurno ne privilegovan položaj. Tražimo sistem.“
Poručio je da se stvarni prioritet koji država daje mladima mora vidjeti kroz konkretne odluke:
„Prioritet se ne dokazuje saopštenjem. Prioritet se vidi u zakonu, budžetu i mjestu za stolom za kojim se odlučuje.“
Zaključujući govor, Vukićević je poručio da odgovor na pitanje ko odlučuje o budućnosti mladih ne može biti ni samo Vlada, ni Skupština, ni lokalna samouprava, ali ni samo omladinske organizacije.
„Tražimo da niko više ne odlučuje o nama — bez nas.“
Mladi imaju glas. Omladinske organizacije mu daju snagu.
